ថ្ងៃអង្គារ ១០កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១០ ខែធ្នូ ឆ្នាំ២០២៤ លោក ឯម ភា នាយខណ្ឌរដ្ឋបាលជលផលកំពង់សោម និងលោក ឈុន ថុល នាយផ្នែករដ្ឋបាលជលផលទំនប់រលក បានចូលរួមកិច្ចប្រជុំពិនិត្យលើការស្នើសុំអនុញ្ញាតធ្វើវារីវប្បកម្ម និងបញ្ហាប្រឈមរបស់វារីវប្បករក្នុងខេត្តព្រះសីហនុ ក្រោមអធិបតីភាព លោក ឯម ភាព អភិបាលរងខេត្តព្រះសីហនុ ដោយមានការចូលរួមពីលោកនាយករងរដ្ឋបាលខេត្ត លោក លោកស្រីអភិបាលរងក្រុងស្រុក អង្គភាពពាក់ព័ន្ធ និងអាជ្ញាធរឃុំ សង្កាត់។ ជាលទ្ធផល៖ ១.អង្គភាពច្រកចេញចូលតែមួយបានលើកឡើងនូវដំណើរការនៃសេវាវារីវប្បកម្ម និងបញ្ហាប្រឈមពាក់ព័ន្ធនិងការស្នើសុំច្បាប់វារីវប្បកម្មសមុទ្រដែលផ្ដោតទៅលើដែនសមត្ថកិច្ចនៃទីតាំង។ ២.ប្រធានអង្គប្រជុំបានបញ្ជាក់ជូនជំនាញពាក់ព័ន្ធត្រូវសិក្សាលើដែនសមត្ថកិច្ច និងបច្ចេកទេសឲ្យបានច្បាស់លាស់មុននឹងបន្តផ្សព្វផ្សាយដល់អ្នកចិញ្ចឹម ហើយត្រូវសហការគ្នារវាងអាជ្ញាធរ មន្ត្រីជំនាញដើម្បីផ្តល់សេវាល្អដល់វារីវប្បករទាន់ពេលវេលា។