ថ្ងៃព្រហស្បតិ៍ ២កើត ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៨ ខែវិច្ឆិកា ឆ្នាំ២០១៩ លោក យស់ ចន្ថាណា អនុប្រធានមន្ទីរកសិកម្មរុក្ខាប្រមាញ់ និងនេសាទ ខេត្តព្រះសីហនុ បានដឹកនាំខណ្ឌមន្ត្រីរដ្ឋបាលព្រៃឈើចំនួន ៦នាក់ សហការជាមួយមន្ត្រីបរិស្ថានចំនួន១១នាក់ ដើម្បីចុះពិនិត្យទីតាំងដីជាក់ស្តែង ដែលបានកាប់ទន្ទ្រាន ដើមអាកាស្យា ដុតហ៊ុមព័ទ្ធ ធ្វើរបង ពុះឡូត៍ចែកគ្នា យ៉ាងអនាធិបតេយ្យ នៅចំណុចជើងតាសៅ ភូមិ៣ សង្កាត់លេខ១ក្រុង/ខេត្តព្រះសីហនុ និងបានចុះស្រង់យកចំណុចនិយាមកា ដើម្បី តម្លើងផែនទី។ ជាលទ្ធផល នៅពេលដែលតម្លើងផែនទី គឺ ទីតាំងដីនោះ គឺស្ថិតនៅជើងភ្នំតាសៅ ភូមិ៣ សង្កាត់១ ក្រុង/ខេត្តព្រះសីហនុ ដែលមានទំហំ ៨០៨៥៩ ម៉ែត្រការ៉េ និងស្ថិតនៅក្នុងតំបន់ការពារក្បាលឆាយ អនុក្រឹត១១៦ ទាំងស្រុង។